Un xuíz federal en Estados Unidos ordenou este martes a liberación de 17 chineses musulmáns detidos desde hai sete anos na base militar de Guantánamo.
O maxistrado Ricardo Urbina determinou que non existen probas de que os membros do grupo étnico uigur estivese formado por "combatentes inimigos" ou que supuxesen un risco para Estados Unidos.
A decisión xudicial supón un duro revés para o presidente estadounidense, George W. Bush, quen anulaba nos seus discursos a potestade dos xuíces federais para ordenar a liberación de detidos de Guantánamo nos Estados Unidos. O grupo de musulmáns chineses esperaba a súa posta en liberdade desde o 2004.
Prohibidas as detencións indefinidas
O Pentágono xa non considera aos 17 uigures "combatentes inimigos". Con todo, permanecían retidos na base naval estadounidense porque EE UU foi incapaz de atopar un país que os acolla.
O Goberno chinés pediu o traspaso da custodia, pero a administración Bush e organizacións a prol dos dereitos humanos temeron que os musulmáns fosen torturados ao ser devoltos ao seu país de orixe.
É a primeira vez que se toma unha decisión destas características. O maxistrado sinalou na súa argumentación que a Constitución estadounidense prohibe detencións indefinidas sen causa nin cargos.
Actualidade